Молитва мученице Александре, царице Римской

Тропарь, глас 4*

Царства земнаго славу презревши,/ Единаго Христа, нас ради распятаго, возлюбила еси/ и, Того мужественне исповедающи,/ венцем мученическим увенчалася еси,/ всеблаженная царице Александро./ Темже и ныне Престолу Царя славы на Небесех предстоящи,// молися о спасении душ наших.

Кондак, глас 2

Храм Твой всечестный,/ яко цельбу душевную обретше вси вернии,/ велегласно вопием ти,/ мученице Александро, великоименитая:// Христа Бога моли непрестанно о всех нас.

Молитва

Церкве Святыя украшение и мучениц славо, преславная царице Александро! К тебе во умилении сердец наших припадаем и твоего заступления у Господа о нас молим. Аще бо чистоте твоей не поревновахом и безбоязненнаго исповедания твоего не приобщихомся, паче же многими прегрешеньми и лютыми паденьми и отступствы гнев Божий привлекохом, но не хощем во гресех наших умрети, и на твой подвиг взирающе, паки на одоление страстей наших ополчаемся. Сие же ведуще, яко кроме благодатныя помощи ничтоже благое сотворити возможем, тую помощь нам от Господа подати тя просим. Ты бо, страстотерпице святая, велие ко Владыце дерзновение стяжала еси, яко прославившая Его в чистоте души твоея и в телеси твоем страдальчестем, отреклася еси славы и чести мира сего, возлюбивши богатство и похвалу Христовы. Темже от того богатства и нашей нищете духовная подаждь дарования, и от безмерных прегрешений жизнь нашу соблюди, мир и безмятежие нам испроси, от нужды и уныния нас предстательством Твоим огради, друг ко другу нас в послушании и братолюбии настави и ко Господу Очи сердец наших всегда возводи, во еже славити нам Отца, и Сына, и Святаго Духа державу, и твое теплое предстательство, во веки веков. Аминь.