Тропари святым благоверным князьям и царям

Александру Невскому (в схиме Алексию), блгв. вел. кн.,

глас 4

Яко благочестиваго корене/ пречестная отрасль был еси, блаженне Александре,/ яви бо тя Христос яко некое Божественное сокровище Российстей земли,/ новаго чудотворца преславна и Богоприятна./ И днесь сошедшеся в память твою верою и любовию,/ во псалмех и пениих радующеся славим Господа,/ давшаго тебе благодать исцелений./ Егоже моли спасти град сей,/ и державе Российстей Богоугодней быти,// и сыновом Российским спастися.

Ин тропарь, на перенесение мощей,

глас 4

Познай свою братию, российский Иосифе,/ не в Египте, но на Небеси царствующий,/ благоверный княже Александре,/ и приими моления их,/ умножая жита людем плодоносием земли твоея,/ грады владычествия твоего ограждая молением,// православным христианом на сопротивныя споборствуя.

Величание (на успение блгв. вел. кн. Александра Невского)

Величаем тя,/ благоверный княже Александре,/ и чтим святое успение твое,/ и ныне молиши за нас// Христа, Бога нашего.

Андрею Боголюбскому, блгв. вел. кн.,

глас 8

Яко благоверен и праведен,/ за любовь Христа Бога от своих смерть приял еси,/ кровь свою пролияв,/ якоже прежде сродницы твои и страстотерпцы Борис и Глеб,/ ихже кровем совопиет и твоя кровь, святе, к Богу,/ якоже Авеля и Захарии праведных,/ благоверный страстотерпче, великий княже Андрее,/ с нимиже Христа Бога моли о стране нашей, еже Богоугодней быти// и сыновом российским спастися.

Андрею Смоленскому, блгв. кн.,

глас 8

Блаженство Евангельское возлюбив,/ Богомудре княже Андрее,/ чистоту сердца девством почтил еси/ и, суету мира сего презрев,/ устремился еси зрети Бога,/ Иже тя прослави чудесы/ во врачевании различне страждущих./ Сего ради молим тя:/ проси нам у Христа Господа/ всяких скорбей избавления// и получение Царства Небеснаго.

Анне Кашинской, блгв. вел. кн.,

глас 3

Днесь восхваляем тя, преподобная мати,/ великая княгине инокине Анно:/ яко бо лоза плодовита посреде терния,/ процвела еси во граде Кашине твоими добродетельми,/ и всех удивила еси чудным твоим житием,/ темже Христу Богу угодила еси,/ и ныне, радующися и веселящися,/ пребываеши с лики преподобных жен,/ наслаждающися райския красоты и веселия./ Молим убо тя:/ моли о нас Человеколюбца Христа, Бога нашего// даровати нам мир и велию милость.

Величание

Ублажаем тя,/ преподобная мати, великая княгине Анно,/ и чтим святую память твою,/ наставнице инокиням// и собеседнице Ангелом.

Анне Новгородской, блгв. кн.,

глас 1

От запада возсиявши, яко звезда небосветлая,/ прияти Православную веру сподобилася еси,/ в нейже плод благославный Русской земле принесши,/ святая благоверная княгине Анно,/ Христа всем сердцем возлюбила еси,/ Того оправдания и законы хранящи;/ темже днесь всесвятую твою память празднующе,// грехов оставление молитвами твоими приемлем.

Борису и Глебу, во св. Крещении Роману и Давиду, блгвв. кнн., страстотерпцам,

глас 4

Мученическою кровию порфиру окропивше светло,/ украшени предстоите, страдальцы славнии, Царю Безсмертному,/ и, венцы славы от Него приимше,/ молитеся стране нашей подати на враги одоление// и душам нашим велию милость.

Ин тропарь, на перенесение мощей,

глас 4

Днесь церковная расширяются недра,/ приемлющи богатство Божия благодати,/ веселятся русстии собори,/ видяще преславная чудеса,/ яже творите приходящим к вам верою,/ святии чудотворцы Борисе и Глебе,// молите Христа Бога, да спасет души наша.

Василию и Константину Ярославским, блгвв. кнн.,

глас 2

Ваше отечество хвалится обагрением кровей ваших,/ Церковь же Божия радуется,/ приемши телеса ваша,/ людие, песненный лик составльше,/ духовною цевницею вопиют:/ ликуй, Василие, радуйся, Константине,// Ярославлю славо и всей России радосте.

Величание

Величаем вас,/ страстотерпцы Христовы, благовернии князи Василие и Константине,/ и чтим честная страдания ваша,/ вы бо молите за нас// Христа Бога нашего.

Владимиру Ярославичу Новгородскому, чдтв., блгв. кн.,

глас 4

Измлада явился еси, Богомудре княже Владимире,/ Божественный сосуд избран Богови,/ благочестием воспитан, веру непорочну соблюл/ и, храм пречуден Премудрости Божия/ в Великом Новеграде сем устроив,/ тело Твое в Нем предложил еси,/ и ныне, на Небесех предстоя Престолу Святыя Троицы,// молися низпослати и нам велию и богатую милость.

Владимиру и Агриппине Ржевским, блгвв. кнн.,

глас 8

Яко благочестиваго корене пречестная отрасль был еси,/ добре во благочестии пожив, блаженне Владимире,/ тако и с супружницею твоею, прехвальною Агриппиною,/ в мире Богу угодивше, и преподобных житию сподобистеся./ С нимиже молитеся Господеви/ сохранити без вреда отечество ваше,// да вас непрестанно почитаем.

Величание

Ублажаем вас,/ святии чудотворцы Владимире и Агриппино,/ и чтим святую память вашу,/ вы бо молите за ны// Христа Бога нашего.

Всеволоду, в св. Крещении Гавриилу, Псковскому, блгв. кн.,

глас 4

Измлада явился еси, Богомудре княже Гаврииле,/ Божественный сосуд, избран Богови,/ благочестием воспитан, веру непорочну соблюд/ и многи святыя церкви устроив,/ изгнание претерпел еси от своих,/ якоже и целомудрии прародители твои, от брата убиение./ С нимиже предстоя Святей Троице,/ молися державе Российстей сохраненной быти// и всем нам спастися.

Ин тропарь, на обретение мощей,

глас 4

Наста днесь всечестный новый праздник,/ обретение честных мощей/ блаженнаго князя Гавриила,/ веселящи изрядно всех благочестивых множества,/ темже вси вернии,/ сошедшеся во святый храм Живоначальныя Троицы, возопием:/ блаженне княже Гаврииле,/ имея дерзновение ко Христу Богу,// моли спастися празднующим любовию память твою.

Величание (на обрет. мощей блгв. кн. Всеволода (Гавриила))

Ублажаем тя,/ благоверный княже Гаврииле,/ и чтим обретение честных мощей твоих,/ и ныне молиши за нас// Христа Бога нашего.

Вячеславу Чешскому, блгв. кн.,

глас 4

Днесь Ангели с человеки радуются вкупе общим веселием,/ Небо и земля светло ликуют в память твою, святе./ И мы, грешнии, прилежно ти вопием:/ помолися к Владыце о нас,/ избавити ны от напасти/ видимых и невидимых враг,// чтущих пресветлую память твою.

Георгию (Юрию) Всеволодовичу Владимирскому, блгв. вел. кн.,

глас 8

На высоте великаго княжения седя,/ явился еси, благочестием и верою сияя отечеству своему, яко солнце;/ по Святей Троице ревностию разжегся/ и за веру крепко пострадав, кровь твою пролиял еси./ Тем и отсеченая твоя за Христа глава свидетельствует яве о тебе,/ прилепшая по смерти к телеси твоему,/ с неюже и до днесь нетленны пребывают мощи твоя,/ от нихже источаеши исцеления душам и телесем нашим./ Но яко дерзновение имея ко Христу, страстотерпче Георгие,/ непрестанно моли державу твою и сродник твоих// безвредну сохранити молитвами твоими.

Глебу, во св. крещении Давиду, блгв. кн.,

глас 4

Мучениче Господень,/ прославляемь веры твоея ради,/ княже Глебе,/ труждающимся быстрый помощник/ и немощным надежда еси,/ ты бо недуги врачуеши притекающим к тебе с верою./ Темже и мы верою молимся:/ от бед избави нас,// чтущих любовию память твою.

Глебу Владимирскому, блгв. кн.,

глас 4

Днесь светло красуется славнейший град Владимир,/ имея в себе пребогатое сокровище —/ чудоточащия честныя мощи благовернаго князя Глеба,/ имиже украшаяся и хваляся,/ вселенную всю созывает к веселию/ и велегласно вопиет:/ о Владыко Христе,/ даровавый таковую благодать угоднику Твоему,// его молитвами помилуй нас.

Глебу Всеволодовичу Городенскому (иже в Киеве), блгв. кн.,

глас 2

В постничестве от юности добре подвизався, Богомудре,/ ум на враги мужески вооружив,/ оружием крестным сих победил еси,/ твердомудростная повлача, в душу вложи свою./ Темже похваляем тя, княже наш Глебе,/ яко постником ты еси удобрение,/ Киеву — слава// и всей Русстей земли — утверждение.

Даниилу Московскому, блгв. кн.,

глас 3

Явился еси в стране нашей,/ яко звезда пресветлая,/ благоверный княже Данииле,/ лучами света твоего озаряя град твой и обитель твою,/ людем православным поборник еси,/ пленным свободитель и нищим защититель./ Моли Христа Бога/ державе Росийстей даровати мир// и спасти души наша.

Димитрию Донскому, блгв. вел. кн.,

глас 3

Велика обрете в бедах тя поборника земля Русская,/ языки побеждающа./ Якоже на Дону Мамаеву низложил еси гордыню,/ на подвиг сей прияв благословение преподобнаго Сергия,/ тако, княже Димитрие,/ Христу Богу молися,// даровати нам велию милость.

Димитрию Угличскому и Московскому, блгв. царевичу,

глас 4

Царскую диадиму обагрил еси кровию твоею,/ Богомудре мучениче,/ за скиптр крест в руку приим,/ явился еси победоносец,/ и жертву непорочну Владыце принесл еси себе,/ яко бо агнец незлобив от раба заколен еси,/ и ныне радуяся предстоиши Святей Троице./ Молися о державе сродников твоих богоугодней быти// и сыновом российским спастися.

Ин тропарь, на перенесение мощей,

глас 8

Днесь вельми хвалится царствующий град Москва,/ имея в себе праведныя твоя мощи,/ благоверне царевиче Димитрие,/ яко цвети благоуханнии,/ пребываеми во святем храме,/ просвещение подают душам и телом нашим./ Тем радостно тя восхваляем,/ и честное пренесение мощей твоих верно почитаем, и молим тя:/ моли Христа Бога// даровати нам велию милость.

Довмонту, во св. Крещении Тимофею, Псковскому, блгв. кн.,

глас 8

Иже отчее нечестие возненавидев,/ преблаженне княже Доманте,/ и нощи страстныя избег, еже к идолом тщание,/ прииде мыслию к Солнцу славы — Христу,/ озарився благодатию Божественнаго Крещения,/ и ныне во свете Пресвятыя Троицы предстоя,/ моли Христа Бога сохранити и спасти православныя люди/ и град твой от безбожных агарян,/ и латин нашествия, и междоусобныя брани// и спастися душам нашим.

Игорю Черниговскому и Киевскому, блгв. вел. кн.,

глас 4

Наста днесь всечестная память страстотерпца благовернаго князя Игоря,/ созывающая люди в пречестный храм Спасов,/ идеже радостно сошедшеся благочестивых множество/ молитвенно празднуют святую память твою,/ и с верою взывают ти:/ молися, святе, стране Российстей, граду Чернигову и всем православным христианом// в мире и благоденствии спастися.

Величание

Величаем тя, страстотерпче святый благоверный великий княже Игоре, и чтим святую память твою, ты бо молиши за нас Христа Бога нашего.

Иоанну Угличскому, в иночестве Игнатию, Вологодскому, блгв. кн.,

глас 2

В житии своем многи скорби претерпел еси, блаженне,/ и терпения ради венец от Бога приял еси,/ и по смерти своей чудотворец показался еси,/ того ради память твою песньми почитаем,/ преподобне отче наш Игнатие,/ молися, предстоя Святей Троице,/ державе сродник твоих богоугодней быти// и сыновом Российским спастися.

Константину (Ярославу) и чадом его Михаилу и Феодору, Муромским чдтв.,

глас 4

Константин днесь весело ликовствует,/ предстоя Престолу Святыя Троицы,/ видя отечествие свое, мастию духовною сияющее;/ емуже последоваша Михаил и Феодор, сынове его,// и молятся вси трие вкупе о душах наших.

Лазарю, блгв. кн. Сербскому

глас 3

Красоту возжелев славы Божия, в земней Тому благоугодил еси и, порученный ти талант добре возделав, усугубил еси, о немже и подвизався до крове. Отонудуже и мзду болезней твоих, яко мученик, приял еси от Христа Бога: Егоже моли спастися поющим тя, Лазаре.

Михаилу Тверскому, блгв. кн.,

глас 8

Возвысив ум твой к Богу,/ и жития со Ангелы возжелел еси,/ тленную славу земную оставил еси, блаженне,/ и положил еси душу твою за люди твоя,/ восприял еси венец противу трудов твоих, Богомудре Михаиле,// моли Христа Бога о чтущих любовию святую память твою.

Величание

Величаем тя,/ благоверный княже Михаиле,/ и чтим святую память твою,/ иже за Христа кровь свою излиял еси,/ и ныне молиши за нас// Христа, Бога нашего.

Мстиславу, во св. Крещении Георгию, Храброму, Новгородскому, блгв. кн.,

глас 4

Измлада явился еси, Богомудре княже Мстиславе,/ Божественный сосуд, избран Богови,/ благочестием воспитан,/ веру непорочну соблюл еси./ Темже предстоя Святей Троице,/ молися стране Российстей сохраненной быти// и всем нам спастися.

Олегу Брянскому, блгв. кн., прп.,

глас 8

От юности возлюбил Христа всем сердцем, преподобне,/ славу земную яко преходящу оставил еси,/ и царство земное в ничтоже вменив/ лику инок радостно причелся еси,/ и труды многими град Брянск, аки солнце пресветло, озарил еси:/ тем быв Троицы украшение,// моли, княже Олеже, Христа Бога спастися душам нашим.

Петру, в иночестве Давиду, и Февронии, в иночестве Евфросинии, Муромским чдтвв., блгвв. кнн.,

глас 8

Яко благочестиваго корене пречестная отрасль был еси,/ добре во благочестии пожив, блаженне Петре,/ тако и с супружницею твоею премудрою Феврониею,/ в мире Богу угодивше, и преподобных житию сподобистеся./ С нимиже молитеся Господеви,/ сохранити без вреда отечество ваше,// да вас непрестанно почитаем.

Величание

Ублажаем вас,/ святии чудотворцы Петре и Февроние,/ и чтим святую память вашу,/ вы бо молите за ны/ Христа, Бога нашего.

Роману (Олеговичу) Рязанскому, блгв. кн.,

глас 1

Мученьми странноужасными/ и доблестию терпения/ всех преудивил еси, княже Романе:/ честных бо членов твоих по составом резание/ и всего телесе твоего раздробление/ претерпел еси за веру Христову./ Темже и возшел еси к Престолу Царя Христа Бога/ и явился еси новый предстатель Церкве Рязанския./ Молися убо ко Господу,/ да мир и благоденствие дарует граду нашему,/ и испроси у Него милость и спасение// чтущим священную память твою, многострадальне.

Роману Угличскому, блгв. кн.,

глас 4

От младенства явился еси,/ правоверный княже Романе,/ избран от Бога/ благочестия столп необорим,/ веру непорочну соблюл еси,/ молитвами и милостынею и постом Богу угодил еси;/ темже и по смерти явися светлость жития твоего,/ исцеляеши бо недуги немощствующих,/ верою притекающих ко святому твоему гробу./ Сего ради вопием ти:/ радуйся, угодниче Божий Романе,// града Углеча похвало и утверждение.

Ростиславу-Михаилу, блгв. вел. кн.,

глас 6

Обрете тя строителя градов и церквей/ земля Киевская,/ великий княже Ростиславе,/ смуты устранял еси, единство храня,/ темже Господь тебе мудрость ниспосла,/ сего ради Христу Богу молися// спастися душам нашим.

Тамаре, царице Грузинской, блгв.,

глас 4

Во святых дивная,/ Иверии светило,/ благоверная царице Тамаро,/ на горах высоких храмы воздвигшая,/ да в них моления возсылают ко Господу,/ мольбами твоими крепость даровавшая воем христолюбивых людей страны Иверския,/ десницею же своею полчища агарянская низпровергшая,/ моли Христа Бога// спастися душам нашим.

Феодору Ярославичу, Владимирскому, блгв. кн.,

глас 8

В жизни сей утвердися верою,/ в заповедех Господних пребываше непреклонен,/ благоугодих Тому, яко благочестив самодержец/ Емуже подобяся о врученных ти христоименитых людех,/ душу свою положити потщався,/ в землю идяше всезлую и безбожную/ и тамо, пред нечестивым мучителем Христа дерзновенно исповедав,/ мученический венец прият,/ темже, премудре Феодоре Ярославиче,/ Избавителя моли избавити от бед отечество твое и люди,// да тя вси непрестанно почитаем.

Феодору Ярославичу, Новгородскому, блгв. кн.,

глас 8

От благочестиваго корене отрасль благочестивая прозябл еси/ и, скончався в юности, лета долга твоими добродетельми исполнил еси,/ благоверный княже Феодоре,/ сего ради Владеющему временами молимся,/ да молитвами твоими подаст нам долготу лет// и низпослет стране нашей велию и богатую милость.

Феодору Смоленскому, блгв. кн.,

глас 4

Яко целитель преизряден и казатель благоприятен/ мирский мятеж оставил еси,/ и, крест свой на рамо взем,/ божественным житием пожил еси, и воздержанием плоти украсился еси/ к тебе притекающим сосуд избранный показався, всеблаженне Феодоре,/ воспевающих твою память в псалмех и песнех, преподобне,// молися о душах наших.

Феодору Смоленскому и чадам его Давиду и Константину, блгв. кнн.,

глас 4

От юности вашея Христове любви прилепившеся, святии,/ усердно закон и оправдания Того сохранисте,/ отонудуже и чудесными дарованьми обогатившеся,/ исцеления источаете,/ Феодоре, Давиде и Константине,/ о верою вас почитающих,/ молите Христа Бога,// спастися душам нашим.

Ин тропарь, на обретение мощей,

глас 4

Измлада явистеся святии,/ Богомудре Феодоре и блаженне Давиде с Константином славным,/ Божественнии сосуди, избраннии Богови./ Ныне же источаете нам многа исцеления от честных мощей ваших,/ вся ереси потопляюще,/ и спасающе присно град свой,/ и всех верных сохраняюще невредимо/ от видимых и невидимых враг./ Темже верою молим вас, святии:/ молите Христа Бога// в мире сохранитися нам и спасти души наша.

Ин тропарь, на перенесение мощей,

глас 8

Яко звезды многосветлыя от юности возсиявше,/ осветили есте сердца верных пренесением честных мощей ваших,/ во плоти яко Ангели на земли показастеся,/ пощением насаждени бысте,/ яко древа при водах воздержания,/ напоени струями слез ваших, и скверну омысте./ Сего ради явистеся приятелища Божия Духа,/ Феодоре, и Давиде, и Константине,// молите Христа Бога, спастися душам нашим.

Феодору Стародубскому, блгв. кн.,

глас 1

Божественным желанием от юнаго возраста/ весь сам себе Господеви возложив,/ в молитвах и постех образ был добродетели,/ богатство же, и славу, и доброродство телесное яко не сущее презрев,/ Христа единаго от души возлюбил еси,/ и Того Истиннаго Бога пред нечестивым царем исповедал еси,/ и доблестию терпения своего сего ужасил/ и всех преудивил еси./ Телом бо, яко розга, обрезаемь,/ на кийждо состав, удеси резания/ благодарны молитвы изрек еси Господеви./ Тем во страдании своем венец прием,/ к Престолу возшел еси славы/ и со Ангелы предстоиши, всехвальне Феодоре,/ моли Христа Бога// спастися душам нашим.

Ярополку, во св. крещ. Петру, кн. Владимиро-Волынскому, блгв.,

глас 4

Яко благоверен и праведен,/ за любовь Христа Бога от своих си смерть приял еси, Ярополче,/ страстотерпче святый, благоверный княже Волынский,/ и пролиял еси кровь твою,/ якоже прежде сродницы твои и страстотерпцы, Богоблаженнии Борис и Глеб,/ ихже подвигом ревнуя благочестно,/ Господеви взывал еси усердно:/ даруй ми кончину, якоже братиям моим,/ да и аз омыю грехи моя кровию моею/ и избавлюся мира сего тщетнаго и мятежнаго./ Темже, днесь сошедшеся в память твою,/ верою и любовию славим Господа,/ укрепившаго Тебе в подвизе напрасныя смерти,/ якоже бо агнец незлобивый,/ от раба заколен еси,/ и себе самаго жертву непорочну Господеви принесл еси,/ Егоже моли, присноблаженне,/ спасти Отечество твое // и сыновом Российским спастися.