Можно читать в течение дня — короткими подходами.
Сборник на одну тему: 65 фрагментов текста подряд. Можно читать по частям — подзаголовки подсказывают, где начинается следующий текст.
Богородичны восьми гласов, которые поются, когда есть стихира святому в Минее положенная после «Слава»; тогда после «И ныне», поется богородичен того же гласа из числа следующих
Глас 1
В неделю вечера:
Небесных чинов радование, / на земли человеков крепкое предстательство, / Пречистая Дево, / спаси ны, иже к Тебе прибегающия, / яко на Тя упование по Бозе, Богородице, возложихом.
В понедельник на утрени:
Святейшая святых всех Сил, / Честнейшая всея твари, Богородице, Владычице мира, / спаси ны, Спаса рождшая, / от прегрешений тморичных и бед / яко Благая молитвами Твоими.
В понедельник вечера:
Дево Всепетая, / юже в Тебе тайну Моисей пророческима виде очима, / купину горящу и неопаляему, / Божества бо Огнь утробу Твою, Чистая, не опали. / Темже молим Тя яко Матерь Бога нашего, / мир испросити мирови и велию милость.
Во вторник утра:
Блудницу, и блуднаго аз, и разбойника победих, / и мытаря прегрешении преминух, и ниневитяны. / Увы мне, что буду? / како убегну муки, аз, окаянный? / Чистая, припадаю Ти, / ущедри мя милостию Твоею, / якоже оныя Сын Твой спасл есть.
В среду вечера:
Радуйся, радосте прадедов, / апостолов и мучеников веселие / и покров нас, Дево, Твоих рабов.
В четверток утра:
Радуйся, Богородице Дево, / радуйся, похвало всея вселенныя, / радуйся, Пречистая Мати Божия, Благословенная.
В пяток вечера:
Воистинну паче ума / чудная Твоя величия, рождества Твоего, Богоневесто, / яже проповедаша пророцы вси, / вся преславная, / зачатие и рождество, Всепетая, недомысленно и несказанно, / имже мир спасл есть яко Милосерд.
В субботу утра:
Радуйся, от нас Святая Богородице Дево, / чистый сосуде всея вселенныя, / свеще неугасимая, вместилище Невместимаго, / храме необоримый; / радуйся, из Неяже родися Агнец Божий, / вземляй грехи всего мира.
Глас 2
В неделю вечера:
Радуйся, Марие Богородице, храме неразрушимый, / паче же святый, якоже вопиет пророк: / свят храм Твой, дивен в правде.
В понедельник утра:
На Тя упование, Богородице, возложихом, / чаяния да не отпадем, / спаси нас от бед, Помощнице недоумеемым, / и сопротивных советы разори: / Ты бо еси наше спасение, / Благословенная.
В понедельник вечера:
Непроходимая врата, тайно запечатствованная, / Благословенная Богородице Дево, / приими моления наша / и принеси Твоему Сыну и Богу, / да спасет Тобою души наша.
Во вторник утра:
Радуйся, Марие Богородице, храме неразрушимый, / паче же святый, якоже вопиет пророк: / свят храм Твой, дивен в правде.
В среду вечера:
Яко плодовита маслина, / Дева израсти Тебе, / Плода Животнаго, / плодоносити мирови / велию и богатую милость.
В четверток утра:
Все упование мое / на Тя возлагаю, Мати Божия, / сохрани мя под кровом Твоим.
В пяток вечера:
Спаси от бед рабы Твоя, Богородице Дево, / яко вси по Бозе к Тебе прибегаем, / яко к нерушимей стене и предстательству.
В субботу утра:
Приидите, Матерь Света, песньми немолчными зовуще, / вси прославим, / Та бо роди Спасение наше, / и радуйся принесем, яко Единой, рождшей всех Начальнейщаго, / Иже прежде век Бога; / радуйся, Яже Еву падшую паки наздавшая; / радуйся, Пречистая Дево, Неискусобрачная.
Глас 3
В неделю вечера:
Богородице, Предстательнице всех, молящихся Тебе, / Тобою дерзаем и Тобою хвалимся, / и к Тебе все упование наше есть, / моли Рождшагося из Тебе / за непотребныя рабы Твоя.
В понедельник утра:
Святопервочистая похвало сущи Небесных чинов, / апостолов пение / и пророков сбытие, Владычице, / приими молитвы наша.
В понедельник вечера:
В женах Святая Богородице, / Мати Безневестная, / моли, Егоже родила еси, Царя и Бога: / да спасет нас яко Человеколюбец.
Во вторник утра:
Без семене зачала еси / от Духа Святаго, / и, славословяще, воспеваем Тя: / радуйся, Пресвятая Дево.
В среду вечера:
Вельми согрешающа мя, Отроковице, / исхити великою Твоею молитвою пламене нужднаго / и исправи, Чистая, Твоими мольбами, / ко спасенным стезям наставляющи мя / матерними Твоими молитвами.
В четверток утра:
Без семене зачала еси / от Духа Святаго, / и, славословяще, воспеваем Тя: / радуйся, Пресвятая Дево.
В пяток вечера:
В женах Святая Богородице, / Мати Безневестная, / моли, Егоже родила еси, Царя и Бога: / да спасет нас яко Человеколюбец.
В субботу утра:
Без семене зачала еси / от Духа Святаго, / и, славословяще, воспеваем Тя: / радуйся, Пресвятая Дево.
Глас 4
В неделю вечера:
Радуйся, Света облаче; / радуйся, свещниче светлый; / радуйся, ручко, в нейже манна; / радуйся, жезле Ааронов; / радуйся, купино неопалимая; / радуйся, чертоже; радуйся, престоле; / радуйся, горо святая; / радуйся, прибежище; / радуйся, Божественная трапезо; / радуйся, двере тайная; / радуйся, всех радосте.
В понедельник утра:
Богородице, всех Царице, / православных похвало, / еретичествующих шатания разори / и лица их посрами, / не кланяющихся, ниже чтущих, Пречистая, / честный Твой образ.
В понедельник вечера:
Избави нас от нужд наших, / Мати Христа Бога, / рождшая всех Творца, / да вси зовем Ти: / радуйся, едино предстательство душ наших.
Во вторник утра:
От всех бед рабы Твоя сохраняй, / Благословенная Богородице, / да Тя славим, надежду душ наших.
В среду вечера:
Имуще Тя, Богородице, упование и предстательство, / вражиих навет не убоимся, / яко спасаеши души наша.
В четверток утра:
Тя, стену стяжахом, Богородице Пречистая, / и благоутишное пристанище, и утверждение. / Темже молюся, / иже в житии обуреваемь / окорми и спаси мя.
В пяток вечера:
Свеще неугасимая, престоле праведный, / Пречистая Владычице, / моли спастися душам нашим.
В субботу утра:
Едина Чистая и Пречистая Дево, / Яже Бога безсеменно рождшая, / моли спастися душам нашим.
Глас 5
В неделю вечера:
Страшно, и преславно, и велие таинство: / Невместимый во чреве вместися / и Мати по рождестве паки пребысть Дева / Бога бо роди, из Нея воплощенна. / Тому возопиим, Тому песнь рцем, / с Ангелы воспевающе: / Свят еси, Христе Боже, / Иже нас ради вочеловечивыйся, слава Тебе.
В понедельник утра:
Обрадованная, ходатайствуй Твоими молитвами / и испроси душам нашим множество щедрот / и очищение многих прегрешений, молимся.
В понедельник вечера:
Утоли болезни / многовоздыхающия души моея, / утолившая всяку слезу от лица земли: / Ты бо человеков болезни отгониши / и грешных скорби разрушаеши. / Тебе бо вси стяжахом надежду и утверждение, / Пресвятая Мати Дево.
Во вторник утра:
Обрадованная, ходатайствуй Твоими молитвами / и испроси душам нашим множество щедрот / и очищение многих прегрешений, молимся.
В среду вечера:
Блажим Тя, Богородице Дево, / и славим Тя, вернии, по долгу, / град непоколебимый, стену необоримую, / твердую Предстательницу / и прибежище душ наших.
В четверток утра:
Блажим Тя, Богородице Дево, / яко из Тебе возсия Солнце правды, Христос, / имеяй велию милость.
В пяток вечера:
Тебе молимся яко Божий Матери: / Благословенная, моли / о спасении душ наших.
В субботу утра:
Оле окаянная душе! / Кий ответ имаши рещи Судии во он час, / егда Престоли поставятся на Суде / и Судия приидет от Небес, / сошед со тьмами ангельскими? / Егда сядет на Судищи / прю сотворити с рабы непотребными, подобными мне, / что отвещати имаши? / что же принести тогда? / Поистинне ничтоже, / ум и тело осквернивши твое. / Темже припади к Деве и зови непрестанно, / подати тебе богатно грехов прощение.
Глас 6
В неделю вечера:
Архангельски воспоим, вернии, / Небесный чертог и дверь запечатанну воистинну: / радуйся, Еяже ради отрасте нам Спас всех, Христос, / Жизнодавец и Бог, / низложи, Владычице, мучители, / безбожныя враги наша / рукою Твоею, Пречистая, / упование христиан.
В понедельник утра:
Архангельское слово прияла еси, / и херувимский престол показалася еси, / и на объятиях Твоих носила еси, Богородице, / Надежду душ наших.
В понедельник вечера:
Никтоже, притекаяй к Тебе, / посрамлен от Тебе исходит, / Пречистая Богородице Дево, / но просит благодати / и приемлет дарование к полезному прошению.
Во вторник утра:
Великих дарований, Чистая Дево Богомати, / Ты сподобилася еси, / яко родила еси плотию Единаго от Троицы, / Христа Жизнодавца / во спасение душ наших.
В среду вечера:
Око сердца моего / воспущаю к Тебе, Владычице: / не презри малаго моего воздыхания / в час, егда судит Сын Твой миру, / буди ми покров и Помощница.
В четверток утра:
Преложение скорбящих, / пременение болящих еси, Богородице Всепетая, / спаси град и люди, / боримых умирение, обуреваемых тишина, / Едина Предстательнице верных.
В пяток вечера:
Молитвами Рождшия Тя, Христе, / мученик Твоих, и апостол, и пророк, / и святителей, преподобных, и праведных, и всех святых / усопшия рабы Твоя упокой.
В субботу утра:
Бога, из Тебе воплотившагося, разумехом, Богородице Дево: / Того моли о спасении душ наших.
Глас 7
В неделю вечера:
Еже радуйся, Тебе зовем со Ангелом, Богоневесто, / чертог, и дверь, и престол огненный нарицающе Тебе, / и несекомую гору, и купину неопалимую.
В понедельник утра:
Умири молитвами Богородицы жизнь нашу, / вопиющих Ти: / Милостиве Господи, слава Тебе.
В понедельник вечера:
Радуйся, Солнца облаче мысленнаго и неизреченнаго, Владычице; / радуйся, всесветлая свеще; / радуйся, свещниче всезлатый. / Тобою, Пресвятая, Ева избавлен от клятвы. / Но яко имущи дерзновение / ко Благопременному Сыну Твоему и Богу, / матернею Твоею молитвою / не оскудей молитися, Пречистая.
Во вторник утра:
Цвет, Христе, прозябл еси от Девы / и просветил еси род человеческий. / Господи, слава Тебе.
В среду вечера:
Едину по Рождестве Пречистую Деву воспоим, / яко Матерь Бога Слова, / глаголюще: слава Тебе.
В четверток утра:
Родился еси от Девы несказанно, Христе, / и просветил еси сущия во тьме, вопиющия: / Господи, слава Тебе.
В пяток вечера:
Яже, Едина Невместимаго приимши / и рождши Бога Слова воплощенна, / моли спастися душам нашим.
В субботу утра:
Моли, Дево, / со апостолы и мученики / обрести на Суде преставльшимся / велию милость.
Глас 8
В неделю вечера:
Архангела Гавриила глас восприимше, рцем: / радуйся, Мати Божия, / Яже Жизнодавца Христа миру рождши.
В понедельник утра:
Небесная поют Тя, / Обрадованная, Мати Безневестная, / и мы славословим неизследованное Твое Рождество, / Богородице, моли спастися душам нашим.
В понедельник вечера:
Радуйся, вселенныя похвало; / радуйся, храме Господень; / радуйся, горо приосененная; / радуйся, всех прибежище; / радуйся, свещниче златый; / радуйся, славо православных честная; / радуйся, Марие, Мати Христа Бога; / радуйся, раю; радуйся, Божественная трапезо; / радуйся, сене; радуйся, ручко всезлатая; / радуйся, всех упование.
Во вторник утра:
Кров Твой, Богородице Дево, / врачевство есть духовное: / в онь бо прибегающе, / от душевных недуг избавляемся.
В среду вечера:
Аз, Дево Святая Богородице, / к Покрову Твоему прибегаю, / вем, яко обрящу Тобою спасение, / можеши бо, Чистая, помощи мне.
В четверток утра:
Исхити мя, Владычице, / руки змия человекоубийцы, / хотяща мя лукавством поглотити до конца; / сокруши челюсти его, молю Тя, / и козни разори, / яко да, избыв от ногтей его, / величаю заступление Твое.
В пяток вечера:
Чистая Дево, / Слова врата, Бога нашего Мати, / моли спастися нам.
В субботу утра:
Владычице, приими молитвы раб Твоих / и избави нас / от всякий нужды и печали.
Источник: Православный молитвослов
Текст скопируется целиком — без меню, рекламы и пояснений сайта.
Об этой молитве
Церковнославянский текст тропаря иногда кажется тёмным. Читайте медленно, по смыслу; полный перевод можно найти в толковых молитвословах. Читайте так, как говорили бы с человеком, которому доверяете.
Раздел: Тропари и кондаки. Короткие песнопения Церкви — праздникам и святым.